الخميس، 2 أغسطس 2018

واقع لم يكتمل( قصة قصيرة)





أتت بكل رقة من مقعدها على الشاطئ تطلب شمسية لتحميها من لهب الشمس الذي جعل وجنتيها شديدي الإحمرار ، 
فجاء بها شاب حسن المظهر رقيق الطلعة و بكل أدب وضعها لها وسألها اي طلبات آخرى ، فقالت شكرا لك. 

انتهى الحوار لكن لم ينتهي حوار الأعين ، فقد شد كل منهما الاخر ، و كل منهم ظل ينظر إلى الآخر خلسة ، 
ولم يدرك كل طرف أن الآخر ينظر إليه. 

حل الغروب وأتى الليل ، فقامت من على الشاطئ ، وجاء هو حمل الشمسية. قال لها تصبحي على واقع سعيد أبتسمت له وقالت في نفسها وأنت في هذا الواقع. 

مر يوم وأثنين وأسبوع وهما على هذا الحال ، كانت تتمنى محادثته لها ، وهو متردد بالحديث. 

وفي اليوم التالي لم تأتي كعادتها ، فسأل عنها فعلم أنها رحلت

وأنتهت قصتهما قبل أن تبدأ ، لكنها ظلت تحلم به وبنظرات عينيه فظل هو حلمها الجميل و واقعها الذي لم يكتمل
وهو أصبح معجب بعيون آخرى و آخرى و آخرى. 

تمت

الخميس، 21 يونيو 2018

البروتين



السلام عليكم
البروتين 

البروتين من اهم العناصر الغذائية التي يحتاجها الجسم

فالبروتين يمد الجسم بالطاقة ويبني العضلات 

لكن كثرتة ايضا تضر الجسم فالاعتدال فكل شئ واجب

وبالنسبة للدايت البروتين المناسب هو الذي فيه دهون قليلة 

وهو البروتين الابيض مثل

 صدور الدجاج والرومي 

و البيض ( البياض افضل لانه قليل الدهون عن الصفار)

و المشروم

يجب تقليل البروتين الاحمر فهو عالي السعرات عن الابيض

 مثل اوراك الدجاج و الرومي والبط والحمام واللحم 

وطبعا فيه البروتين النباتي اللي في البقوليات

 ودي دهون قليلة لكن عاليه الكاربوهيدرات يجب اكلها لكن بكميات قليلة وبدون نشويات معها

و فيه بروتين في اللبن والجبن والزبادي يجب علينا ان نختار الخاليه الدسم 

ومن الاجبان الجبن القريش


والبروتين موجود ايضا في الخضروات والفاكهه والمكسرات لكن بنسب متفاوته

والاعتدال في الاكل صحة



اتمنى لكم صحة افضل


اجتهادي الشخصي
تحياتي

توست اسمر صحي جدا


السلام عليكم و رحمة الله وبركاته

طريقة عمل توست بالدقيق الاسمر اللي هو دقيق القمح الكامل

اولا المقادير

350 جرام دقيق او على حسب حجم القالب
معلقتين طعام عسل اسود و ممكن عسل نحل
معلقتين طعام زيت ويفضل زيت زتون
خميرة
رشه ملح
ماء دافي للعجن



الطريقه
هنضيف رشه الملح على الدقيق و نقلب
نضيف الزيت و نقلب كويس
نضيف الخميرة
نحط شويه من الماء الدافي على العسل الاسود عشان يدوب ونضيفه
نضيف الماء تدريجاً حتى تتماسك العجينه بس تكون لينه مش ناشفه




هنغطيها ونسيبها ساعه تخمر
بعد ساعه تقريباً هتكون كدة


الخطوة دي اختياريه

هنفرد العجينه تاني ونضيف ليها البذور اللي عايزنها
انا ضفت بذور الكتان و حبة البركه



بعدين هنقفل عليها كدة


والناحيه التانيه كمان
ندهن قالب التوست بزيت او نحط ورق زبدة و نحط العجين في القالب و نظبطها كويس فيه و نضيف على الوش بردو بذور و نضغط عليها بالراحة عشان تلزق في العجينه



نغطيها تاني ونسيبها تخمر ساعه هتعلى تاني



ندخلها الفرن و يكون شغال قبلها بربع ساعه على درجة حرارة عاليه مدة نص ساعه تقريباً الى ساعة الى ربع

دة بعد ما استوى



اول ما يطلع نرش عليه رشه ماء خفيفة جداً و نغطيه بفوطة نضيفة لحد ما يبرد خالص بعدين نقطعه
بيكون مقرمش من برة و هش من جوة




ممكن يقعد يومين برة التلاجة و خمس ايام في التلاجة و ممكن يتحط في الفريزة

و بالهنا والشفا


من مطبخي
تحياتي

اسهل واسرع خبز صحي


السلام عليكم
هعمل معاكم النهاردة اسهل واسرع عيش صحي

المقادير
للاكله الواحدة لفرد واحد
50 جرام دقيق اسمر( دقيق القمح الكامل) 
رشه ملح
ماء للعجن( ميا عادية من الحنفية او دافية مش هتفرق) 

الطريقة
هنضيف رشه الملح على الدقيق ونقلب
نضيف الماء تدريجياً لحد ما تبقى عجينة متماسكه
هنسيبها ترتاح خمس دقايق بعدين نقسمها نصين





نرش شوية دقيق ونفرد عليها قطعة عجين بالنشابه كويس





و يكون سمكها رقبق كدة


بس كدة
هنسويه ازاي
هنحط طاسه او صينية على النار بدون اي دهون لحد ما تسخن
هنحط الرغيف في الطاسة ثواني لحد ما نلاقي الرغيف بقى متماسك و بقى يتحرك في الطاسه تقلبيه ونفس الطريقة نعمل التاني
وهيبقى كدة







يتاكل على طول سخن
لو هيتشال يبقى يتلف في فوطة على طول وهو سخن لحد ما يبرد خالص بعدين يتحط في كيس بلاستيك
ممكن يتحط في التلاجة والفريزر
ويتسخن في طاسه بردو على النار 

ملحوظة

ممكن يتسوى على خفيف اقل من اللي في الصورة ويبقى زي العيش التورتيلا ويتعمل فيه شاورما 


وبالهنا والشفا

من مطبخي
تحياتي

كريب صحي

السلام عليكم

انا بعمل رجيم من كام شهر
بس مش حارمه نفسي من حاجه ومدلعاها على الاخر
فعملت كريب دايت طبعا وكان روووووعه

هقولكم على الطريقه 

عيش الكريب نفسه عملته من الدقيق الاسمر اللي هو دقيق القمح الكامل
50 جرام دقيق 
رشه ملح 
بيضه
نص كوب لبن
نص كوب ماء
هنضرب البيضه مع رشه الملح ونحط الدقيق ونضيف اللبن و نقلب
بعدين نضيف الميا بالتدريج
هيتقلب لحد ما يبقى القوام سائل لكن تقيل شويه زي كدة




هنجيب طاسه او صينيه مدهونه زيت قليل اوي ونسخنها
هناخد نص الكميه او لو الكميه كبيرة هناخد مقدار كبشه المطبخ ونحطها في الطاسه و نفردها براحه لحد ما تشكل قرص جوة الطاسه وبيكون رقيق
يدوب نلاقي العجين لونه غير نقلبيه الناحيه التانيه

دة شكله




و دة سمكه



و دة بعد ما عملت الكريب بالحشوة

دة شاورما فراخ و طبعا دايت
قطع الشاورما متبله بتتبيله الشاورما
تتشوح في طاسه من غير اي دهون ونحط عليها فلفل اخضر وبصل و طماطم لحد ما تستوي وبس كدة
نحطها في الكريب و شويه موزريلا و زتون و نلفه




و دة بسطرمه و موزريلا





بس كدة وبالهنا والشفا


من مطبخي
تحياتي

الأربعاء، 20 يونيو 2018

الطعام .. الشراب لحياة افضل



السلام عليكم و رحمة الله و بركاته

اهلا بيكم اخوتي الكرام

هتكلم النهاردة ان شاء الله في سلسلة دايت & لايت عن

الطعام .. الشراب

اولا الطعام

يمكننا تناول كل شئ واي شئ نشتهيه بلا حرمان لان كل ممنوع مرغوب
لكن يجب مراعاة نقطتين


1-طريقة اعداد الطعام

علينا استبدال الطريقة الغير صحية بطريقه طهو صحية
يمكن استبدال المقليات بالمشويات او الطهو في الفرن
استبدال المسبكات المليئه بالدهون بالطهو بالبخار او بطريقة الني في ني
استبدال الحلويات بالفواكه
استبدال الوجبات الصغيرة بين الوجبات الاساسية بالخصراوات
استبدال الدقيق الابيض بالاسمر لصنع المخبوزات 
والارز بالارز الاسمر ويسمى ايضا البني او الارز البسمتي
ادخال الطعام ذات الياف عالية مثل الشوفان والبليله والدقيق الاسمر و يسمى ايضا دقيق القمح الكامل

الامر مش صعب بس محتاج نظام 


2- كمية الطعام

كل فرد منا يحتاج عدد معين من السعرات الحرارية كل على حسب وزنه و مجهوده اليومي
و الاكثار من السعرات تزيد في الوزن
فتقليل كميه الطعام مع طريقة الطهي الصحية عاملان مهمان في انقاص الوزن
وهذا ما نريد

التقليل في الكمية من الافضل ان يكون تدريجيا لتتعود المعدة على الكميات القليله تدريجيا
و تنكمش فبعد فترة عند تناول كمية صغيرة سنشعر بالشبع سريعا


ثانيا الشراب

اهم شئ واكثر شئ يساعد على تخفيض الوزن هو
الماء
يجب الاكثار من شرب الماء 
يعني نشرب الماء بشراهه في كل وقت
لا نترك زجاجه الماء بعيدة عنا
 فهي العنصر الاهم في انقاص و تنظيف الجسم من السموم

استبدال المشروبات الضارة كالمشروبات الغازيه بالمشروبات المفيدة
الاقلال من الشاي و القهوة لتخفيض السكريات وشرب المشروبات الحارقة

اجتهادي الشخصي
تحياتي